عدد المساهمات : 279 تاريخ التسجيل : 31/07/2011 العمر : 38 الموقع : elshefmony.mam9.com
موضوع: الممبار المصرى من مطبخ الشيف مونى بالصور الجمعة أكتوبر 18, 2013 11:51 am
السلام عليكم ورحمة الله كل عام وانتم بخير عيد اضحى سعيد ان شاء الله طبعا انتو وانا مش متعودين انى انزل طبخات بس عشان احنا فى عيد الاضحى قلت انزل طبخة بمناسبة العيد وتكون الناس بتحبها فحبيت اوريكم الممبار المصرى بيتعمل ازاى ندخل على المكونات كيلو ممبار(طبعا هنجيبه متنضف من عند الجزار) مقادير الخلطة كوب زيت 2 كيلو طماطم 4 بصلات متوسطة الحجم 8 كوب رز مصرى مغسول 4 حزمة كسبرة خضراء 2 حزمة بقدونس 2 حزمة شبت ملح فلفل اسود حسب الرغبة 4 معالق صغيرة بهارات محشى 2 ملعقة صغيرة كمون 2 ملعقة صغيرة كسبرة ناشفة الطريقة هنبشر البصل وهنحطه مع الزيت على النار
هنضرب الطماطم فى الخلاط ونصفيها ونحطها على البصل لما يصفر لونه ونغطى عليهم ونسيبهم على النار لغاية ماتتسبك الطماطم
ونطفى النار ونقطع كل الخضرة اللى عندنا ونحطها عليهم
ونحط عليهم الملح والفلفل وكل التوابل اللى كاتباها
ونحط عليهم الرز المغسول ونقلبهم كويس جدا
ونسيبها تبرد ونبدأ نحشى الممبار ونخلى بالنا بعد مانحشيه نخليه مبطط ونسيب فراغ من الناحيتين عشان نراعى ان الرز حجمه هيتضاعف لما نسلق الممبار ده شكله بعد ماحشيناه
وطبعا احنا مش بنخيط الممبار هو بيتقفل لوحده لما بيتسلق ومتخافوش الرز عمره ماهينزل منه هنغلى ميه على النار ونسلقه لغاية مايستوى وطبعا هنختبره كل شوية وده شكله بعد ماأستوى
هنشيله من الحلة ونحطه فى طبق ونعصر عليه ليمون ووقت القلى نخجرج ونحمره فى زيت طبعا فيه ناس بتحب تحط مع الزيت حتة لية خروف بمناسبة العيد بس احنا مش بنحب كده خالص وطبعا الممبار ده طبق جانبى بنعمل جنبه رقاق باللحمة المفرومة ولحمة مشوية ولو مش فى العيد بدل اللحمة ممكن نعمل فراخ بانيه وده شكله بعد التحمير
موضوع: الممبار المصرى من مطبخ الشيف مونى بالصور 
الجمعة أكتوبر 18, 2013 11:51 am
