محشى كرنب على الطريقة المصرية للمبتدئات من مطبخ الشيف مونى بالصور
كاتب الموضوع
رسالة
الشيف موني
عدد المساهمات : 279 تاريخ التسجيل : 31/07/2011 العمر : 38 الموقع : elshefmony.mam9.com
موضوع: محشى كرنب على الطريقة المصرية للمبتدئات من مطبخ الشيف مونى بالصور الأربعاء ديسمبر 11, 2013 1:42 pm
السلام عليكم ورحمة الله عاملين ايه فى البرد الرهيب ده؟ بمناسبة البرد اللى احنا فيه ده النهارده هقدملكم اكلة شتوية وانا عن نفسى بموت فيها وبحب اعملها كتير وهى محشى الكرنب وعلى فكرة المدينة اللى انا عايشة فيها مشهورة بيها جدا وتعتبر هى الأكلة القومية عندنا بس مشكلة المحشى عند ناس كتير هى طريقة تقطيعه ولفه فالنهارده ان شاء الله موضحة ليكم الخطوات بالصور واتمنى ده يسهل عليكم الموضوغ شوية طبعا فيه كتير دلوقتى فى السوبر ماركت الورق متقطع جاهز وفيه منه محشى كمان وانتى بس تاخديه تساويه بس انا بحب اعمل كل حاجة بنفسى وكمان عشان اضمن نضافة الاكل اللى بناكله انا قدمت الموضوع ده قبل كده بس النهارده عملته بشكل اوضح نبدأ ونقول بسم الله الرحمن الرحيم مكونات الأكلة: كرنبة متوسطة الحجم مكونات خلطة الحشو: 7 كوبايات رز مصرى كيلو طماطم بصلتين متوسطين حزمتين كسبرة خضرا وحزمتين بقدونس وحزمة شبت نصف كوب زيت توابل الخلطة/فلفل اسود_رشة شطة_بهارات _قرفة_كمون_كسبرة ناشفة اول حاجة هنقطع ورق الكرنب ونحطه فوق بعض ونكون مجهزين حلة كبيرة فيها مياه وعليها معلقتين كمون وفصين توم دى اللى هنسلق فيها ورق الكرنب
ولما تغلى الميه هنحط فيها ورق الكرنب كل ورقة لوحدها لمدة متزيدش عن نص دقيقة عشان الورق ميتقطعش مننا واحنا بنحشيه
لغاية مايخلص كل الورق اللى عندنا وكل ورقة بسلقها بحطها فوق اللى قبلها فى بولا كبيرة نيجى بقى للتقطيع هنجيب الورقة اللى اتسلقت ونفردها على طبق كبير ونقطع بالسكينة العرق السميك اللى فى النص
وهنلف الورقة على شكل اسطوانة بالعرض يعنى واحنا بنلفها العروق هتبقى بالعرض
ونقطع الاسطوانة دى ل3 اجزاء او اربعة حسب حجمها
وهناخد اى جزء من اللى قطعناه
ونفرده هتطلعلنا ورقة طويلة
هنقطعها بالعرض عشان ناخد كل ورقة من اللى قطعناهم ونبدأ نحشيهم
وهكذا هنعمل فى كل ورق الكرنبة ونحط الورق المتقطع ده فوق بعض عشان يبقى جاهز معانا للحشو ونبدأ نجهز الخلطة هنبشر البصل ونحطه على النار مع الزيت ونقلبهم
وهنضرب الطماطم فى الخلاط ونصفيها ونحطها على البصل لما لونه يصفر لغاية ماتتسبك
هنطفى النار ونقطع الكسبرة والبقدونس والشبت ونحطهم على البصل والطماطم ونقلبهم
ونحط عليهم الرز المغسول والتوابل
ونقلبهم كويس ونسيبهم يبردوا وكده الخلطة تبقى جاهزة
وخلطة المحشى دى هى اللى بنستخدمها فى مصر فى جميع المحاشى والممبار نرجع للكرنب عشان نبدأ نحشيه هنجيب ورقة من الورق اللى قطعناه ونفردها فى الطبق بالطول ولازم وانتى بتحشى تكون العروق اللى فى الورقة بالعرض زى كده
نحط الحشو على طرف الورقة
هنمسك الخلطة بالورقة ونضغط عليهم واحنا بنلف عشان المحشى يبقى متماسك
ونكمل لف
ونبدأ نرص المحشى فى الحلة اللى هنساويه فيها بشكل دائرى وانا بحب احط فى الحلة من تحت ورق الكرنب الاخضر اللى بيبقى على وش الكرنبه ومش بنحشيه بس الخطوة دى اختيارية
ولما نخلص لف نسيب مسافة فى الحلة من فوق عشان لسه هنحط شوربة وحجم المحشى هيتضاعف نيجى بقى لسواء المحشى هنسخن الشوربة اللى هنسقى بيها المحشى وقبل مانحط الشوربة هنحط الحلة على النار وعلى وشها معلقتين كبار سمنة ونغطيها ونسيبها على النار لمدة 10 دقايق وبعد كده نحط الشوربة بعد ماتكون غليت وطبعا الشوربة هتغطى الكرنب ونجيب طبق يكون على قد الحلة ونحطه فوق المحشى والخطوة دى مهمة لأن الطبق ده بيضغط الشوربة مع البخار ويخلى الكرنب يستوى كويس
ونسيبه على نار هادية لغاية مايستوى وطبعا كل فترة هنختبر سواه وده الشكل النهائى
طبعا انا عارفة ان الكلام ده معظم الستات عارفينه بس زى ماقلتلكم فى البداية موضوعى للمبتدئات مش للمحترفات وبالهنا والشفا يارب موضوعى البسيط ده يكون عجبكم
محشى كرنب على الطريقة المصرية للمبتدئات من مطبخ الشيف مونى بالصور
موضوع: محشى كرنب على الطريقة المصرية للمبتدئات من مطبخ الشيف مونى بالصور 
الأربعاء ديسمبر 11, 2013 1:42 pm
