عدد المساهمات : 279 تاريخ التسجيل : 31/07/2011 العمر : 38 الموقع : elshefmony.mam9.com
موضوع: تورتة بصوص الكاكاو للمبتدئات من مطبخ الشيف مونى الجمعة أكتوبر 04, 2013 1:23 pm
السلام عليكم ورحمة الله كل عام وأنتم بخير ان شاء الله العام القادم كلنا نكون متجمعين على عرفات
انا عملت الموضوع ده بعد ماجاتلى اسئلة كتير عن الكيكة الاسفنجية والتورتات فحبيت اعمل تورتة بسيطة اى مبتدئة او مبتدىء يعرفو يعملوها اولا بالنسبة للكيكات الاسفنجية وليها 3 طرق الطريقة الاولى وهى الطريقة التقليدية وهى اننا بنفصل البياض عن الصفار وبنقلب العجينة بخفة وندخلها الفرن بالراحة عشان الكيكة متهبطش وطبعا الطريقة دى غير انها صعبة وبتاخد وقت جدا كمان مش مضمونة ولما بتنجح الكيكة بتكون ناشفة من جوة وبتحتاج اننا نحطلها سيرب او مربى عشان نطريها الطريقة التانيه اننا نحط محسن جيل ودى اسهل واضمن من الطريقة الاولى وبتنجح مع ناس كتير بس بردو فيه ناس مبتنجحش معاهم الطريقة دى والكيكة بتهبط من النصف لسببين ان المحسن الجيل بيبقى قديم ومركون فبيكون بايز او بسبب حرارة الفرن الطريقة التالته بقى ودى اسهل طريقة واضمنها وكمان احلاهم طعما وهى اننا نستخدم دقيق الاسبونش الجاهز وده بيتباع فى محلات خامات الحلويات وممكن عند العطارين الكبار وبنضيفله المياه والبيض فقط وبتطلع الكيكة هشة وطريةومرتفعة جدا ومش بنحتاج نحطلها سيرب او مربى لما بنقسمها ودى الطريقة اللى عملت بيها الموضوع ودايما دى الطريقة اللى بستخدمها
ندخل بقى على مقادير كيكتنا وهى: نصف كيلو دقيق سبونش(وطبعا دقيق الاسبونش بيكون مضاف ليه كل شىء يعنى الفانيليا والسكر والمحسن والبيكنج بودر احنا فقط بنضيفله البيض والمياه انا بجيب السايب التورتة بتاخد نصف كيلو هتلاقوه عند العطارين الكبار او فى محلات خامات الحلويات لو بلدكم مفيهاش السايب ممكن تجيبوه من السوبر ماركت فيه نوع الطحان كويس جدا او بيتى كروكر وده احسن من الطحان وكمان فيه نوع تونسى اسمه فنواز وده كويس جدا بردو) 6 بيضات كبار نصف كوب مياه مقادير صوص الكاكاو وبردو مقاديره بسيطة جدا لأى مبتدئة كوب الا ربع كاكاو خام كوب الا ربع سكر كوب لبن حليب(ممكن نستبدل اللبن بمياه) قطعة زبدة طرية ملعقة صغيرة عسل نحل للتلميع 2 ملعقة صغيرة جيلاتين بودرة متدوبين فى شوية مياه مقادير الكريم شانتى: ربع كيلو كريم شانتى خام مش اكياس جاهزة نصف كوب لبن بودرة 7 معالق كبيرة سكر بودرة 2 وربع كوب ماء مثلج(ممكن تستبدلى اللبن البودرة والماء المثلج بلبن حليب بس انا بحب الطريقة دى بيكون طعمه احلى) وللتزيين هنحتاج: ربع كيلو فارمسيل ملبس الوان
الاول ده شكل دقيق الاسبونش
هنحط كل مقادير الكيكة على بعض
وهنضرب الخليط بالمضرب الكهربائة من مدة 7 ل10 دقايق وطبعا كل مانضرب اكتر كل ماالنتيجة هتكون احسن لأن نوع الدقيق ده معتمد على الخفق المستمر وده شكل الخليط بعد ماضربناه لمدة 10 دقايق هيكون خفيف وكريمى بالشكل ده
وحطيت الخليط ده فى صينية مقاس 24 وممكن 26 وخبزتها فى فرن منخفض الحرارة لمدة ساعة وشوية وطبعا قبل مابطلعها بختبرها من النصف بشوكة وطبعا كل واحد وفرنها وده شكل الكيكة لما طلعناها من الفرن
وقلبتها على ورق زبدة
وطبعا لازم نسيبها فى التلاجة لمدة يوم كامل عشان لما نقطعها متتبهدلش مننا لأنها بتكون هشة جدا من جوة وطرية وتانى يوم هنقطعها ونحط عليها الكريم شانتى وحبيت اصورلكم الادوات اللى بستخدمها فى التقطيع والفرد ودى طبعا بتسهل الموضوع جدا
وقبل ماأقسم الكيكة بعلم علامة فى الجنب بالكريم شانتى عشان لما اقسمها اعرف مكان كل طبقة وارجعها مكانها والكيكة تكون متساوية قسمتها ل3
وبدأت احشيها بالكريم شانتى وغطتها كلها بيه
ودخلتها التلاجة عشان الكريم شانتى يجمد عليها ولما نحط عليها الفارمسيل يمسك بسهولة وبدأت احضر صوص الكاكاو فى حلة صغيرة هحط الزبدة والكاكاو والسكر
وهنحط عليهم اللبن
وهنحط كل ده على النار مع التقليب لغاية ماكل المكونات تمتزج مع بعضها وده شكل الصوص قبل ماأضيف عليه الجيلاتين والعسل النحل
وده شكل الجيلاتين
وصوص الكاكاو بيغلى على النار هنضيف للجيلاتين مياه عادية من الحنفية يعنى نقطتين وندوب فيهم الجيلاتين ونضيفهم على الصوص ونطفى بعد مايغلى لمدة دقيقة ونضيف معلقة عسل النحل ونقلب ونسيب الصوص يبرد وطبعا عسل النحل ده هو اللى بيخلى الصوص بيلمع مش مطفى وانا بحب احطه على اى صوص حتى على الجناش نطلع الكيكة اللى غطيناها بالكريم شانتى ونبدء نحط الفارمسيل فى الجناب ومن فوق نعمل وردات ودى شكل البلبلة اللى استخدمتها للوردات
وفى النص هنحط الصوص ونحط عليه الملبس الصوص مش هينزل على الفارمسيل لأننا هنكون قافلين عليه بالوردات وطبعا لازم نحط الصوص لما يبرد عشان لو كان سخن اوى هينزل على الفارمسل ويبوزلنا الموضوع معلش انا ذاكرة تفاصيل التفاصيل وفيه ستات وبنات هتقول ماحنا عارفين كل ده انا عارفة طبعا ان الموضوع ده بسيط جدا بالنسبة للمحترفات او حتى الستات الشاطرين بس زى ماقلتلكم انا عاملة الموضوع ده للمبتدئات وده شكل التورتة النهائى
ودى شكلها من جوة لما اتقطعت
يارب موضوعى البسيط ده يكون عجبك ولاتنسونى فى دعائكم
موضوع: تورتة بصوص الكاكاو للمبتدئات من مطبخ الشيف مونى 
الجمعة أكتوبر 04, 2013 1:23 pm
