السلام عليكم ورحمة الله
جيلي الموزاييك اتسمى بالاسم ده عشان عامل زي الزجاج المعشق وليه اسم تاني هو جيلي الجواهر بس الاسم الاكتر شهره هو جيلي الموزاييك
المكونات:
4 انواع جيلي مختلفه
ملعقه صغيره لون طعام اخضر سائل
علبة حليب مكثف
2 ملعقه كبيره جيلاتين بودره
2 كوب ماء دافئ
الطريقه:
اول حاجه هنعمل الجيلي المفروض ان باكو الجيلي بياخد كوبايتين ميه بس انا هعمله بكوب وربع ميه عشان عايزاه يبقى متماسك
ولإن الوان الجيلي محدوده فأنا لونت اللي لونه اصفر خليته اخضر عشان يبقى عندي تنوع في الالوان
وبعد ماهندوب باكو الجيلي في ميه هنحطه على النار مع التقليب لغاية مايغلي
ونطفي النار ونحطه في صينية مستطيله
وكل الانواع هنعملها بنفس الطريقه ونحطهم في التلاجه لغاية مايجمدوا ولما نتأكد انهم جمدوا هنعمل الخليط الأبيض في اناء هنحط الحليب المكثف
ونضيفله نص كوباية من كوبايتين الميه
ونقلبهم مع بعض وبقية كمية الميه هنحطها مع الجيلاتين
وده شكل الجيلاتين البودره
ونقلبهم مع بعض لغاية مايدوب الجيلاتين في الميه الدافيه
ونضيفهم لخليط الحليب المكثف
ونقطع الجيلي اللي حطينهاه في التلاجه بعد مايكون جمد
ونحطهم في الفورمه اللي هنستخدمها بعد مانقلب كل الالوان مع بعض
ونضيفلهم خليط الحليب المكثف بعد مانصفيه
ولازم يكون بارد
ونحطه في التلاجه ولما يجمد نقدمه
وبالهنا والشفا