السلام عليكم ورحمة الله
كل عام وانتم بخير
الخبز التركي بما انه رمضان قرب جدا حلو في السحور وبديل للخبز العادي وكمان عشان احنا بنزهق وبنحب نغير
المكونات:
5 ونص كوب دقيق
ملعقه كبيره خميره جافه
2 ملعقه كبيره سكر
بيضه
كوب زبادي
كوب ماء دافئ
كوب زيت
للوجه:
عسل اسود وماء
3 كوب سمسم
الطريقه:
في اناء هنحط كل المكونات مع بعض ماعدا الدقيق
ونقلبهم
ونضيفلهم الدقيق
ونقلبهم لغاية مايمتزجوا مع بعض وهو مش من النوع اللي عايز عجن زي بقية انواع الخبز والعجينه طبيعتها طريه
ونسيبها تختمر لمدة من ساعه لساعه ونص
وبعد ماتختمر نبدأ نشكلها على شكل ضفيره
وندوب العسل الاسود في شوية ميه صغيرين ونحط فيه الخبز بعد ماشكلناه لمدة ثواني ونشيله بسرعه وممكن نستبدل العسل الاسود بالبيض حسب رغبتكم بس بالنسبالي العسل افضل من البيض بكتير
وبعد مانشيله من العسل الاسود نحطه في السمسم
ونحطه في صينية الخبز برفق
وكالعاده هنخبزه في فرن متوسط الحراره ومسخن مسبقا قبلها بربع ساعه ونطلعه لما يستوي