منتدى الشيف مونى

منتدى متخصص فى المطبخ

 
الرئيسيةالبوابةاليوميةس .و .جبحـثالأعضاءالمجموعاتالتسجيلدخول

شاطر | 
 

 كحك العيد المصرى بالعجمية من مطبخ الشيف مونى بالصور

استعرض الموضوع السابق استعرض الموضوع التالي اذهب الى الأسفل 
كاتب الموضوعرسالة
الشيف موني



عدد المساهمات : 279
تاريخ التسجيل : 31/07/2011
العمر : 31
الموقع : elshefmony.mam9.com

مُساهمةموضوع: كحك العيد المصرى بالعجمية من مطبخ الشيف مونى بالصور   الثلاثاء يوليو 14, 2015 10:45 pm

السلام عليكم ورحمة الله
كل سنة وانتوا طيبين

مقادير الكحك
كيلو دقيق
نصف كيلو سمنة سايحة(استخدمت سمنة بلدى)
كوب حليب (وممكن نستبدله بماء)
ملعقة كبيرة بيكنج بودر
2 ملعقة كبيرة سكر
ملعقة كبيرة ريحة كحك

(وريحة الكحك دى من المكونات الاساسية للكحك المصرى وهى عبارة عن خلطة بهارات مكونة من حبهان وقرنفل وجنزبيل وقرفة وشمر مطحونين واحنا بنشتريها جاهزة من عند العطارعندنا فى مصر)
سمسم(اختيارى)
الحشو
عجمية بالمكسرات(والعجمية حشوة مصرية قديمة بنحشى بيها الكحك اساس مكوناتها عسل النحل)
مقادير العجمية
كوب الا ربع عسل نحل
ملعقة كبيرة دقيق
ملعقة كبيرة سمنة او زبدة
مكسرات مقطعةاو مجروشة(استخدمت بندق)

الطريقة:
دى صورة ريحة الكحك

وهنبدأ بطريقة العجمية

اول حاجة هنقلب الدقيق مع السمنة على النار بشرط ان الدقيق لونه ميبقاش غامق


وبعد كده ننزل عليهم بعسل النحل

ونقلبهم مع بعض


ونسيبهم يغلو على النار
هنلاقى الخليط تقل وابتدا لونه يغمق وابتدا يعقد يعنى يكون ليه قوام
وكل ماسبناه اكتر كل ماتقل اكتر يعنى انتى حسب مابتحبى قوامه


وقبل مانطفى على العجمية نضيفلها المكسرات المجروشة

ونقلبهم مع بعض ونطفى النار


ونسيبها تبرد عشان نعرف نشكلها
ولما تبرد العجمية هنلاقيهم قوامها طرى ومتماسك
زى كده
وعلى فكرة ياجماعة العجمية طالعة طعمها خطير لدرجة شلت حته منها اكلها لوحدها


كده خلصنا العجمية
ندخل على الكحك
اول حاجة هنجيب اناء كبير نحط فيه الدقيق ونحط عليه المكونات الجافة(البيكنج بودر وريحة الكحك والسكر)



ونقلبهم ونحط السمسم
انا حطيت حوالى 3 معالق كبار سمسم
بس ده مش اساسى طبعا ده زى مانتى متعودة



ونقلبهم كويس
ونعمل حفرة فى النص
ونحط السمنة السايحة على الدقيق
بس خلى بالكم السمنة لازم تكون دافيه مش مغلية
عشان لو سخنة البيكنج بودر هيفسد ومش هينشط العجينة(يعنى فيه الطريقة دى بنحط السمنة على البارد مش مقدوحة زى اللى عملتها قبل كده فى الكحك بالملبن)



ونقلبها كويس اوى
يعنى زى مابنقول فى مصر نبس العجينة
لغاية ماكل الدقيق يتشرب السمنة كويس



وبعد كده ننزل عليهم بالحليب الدافى(بردو مينفعش يكون الحليب مغلى او سخن)
ويستحسن نحط الحليب بالتدريج
فيه ناس بتحط حليب اكتر من كده بس انا مكترتش عشان الكحك يطلع ناعم


ونعجن كويس

و
نبدأ نكور العجينة كور فى الحجم اللى احنا عايزينه
ودى ميزة البيكنج بودر اننا هنشتغل ع طول مش هنسيب العجينة تختمر









ونجهز العجمية ونكورها كور صغيرة


وناخد كورة عجينة ونعمل فيها حفرة فى النص

تااااااااااااااااااااااااااااابعونى
هكمل المشاركة الجاية


_________________



عدل سابقا من قبل الشيف مونى في الثلاثاء يوليو 14, 2015 11:29 pm عدل 1 مرات
الرجوع الى أعلى الصفحة اذهب الى الأسفل
معاينة صفحة البيانات الشخصي للعضو http://elshefmony.mam9.com
الشيف موني



عدد المساهمات : 279
تاريخ التسجيل : 31/07/2011
العمر : 31
الموقع : elshefmony.mam9.com

مُساهمةموضوع: رد: كحك العيد المصرى بالعجمية من مطبخ الشيف مونى بالصور   الثلاثاء يوليو 14, 2015 11:14 pm

ونحط فيها كورة عجمية من اللى احنا عملناهم

ونقفل عليها الاطراف كويس اوى عشان العجمية متطلعش منها اثناء الخبز
وكمان نحاول نصغر حجم العجمية

ونبدأ نحضر الاشكال اللى هنشكل بيها الكحك
انا استعملت فورمات بلاستيك وبردو استعملت مناقيش
عشان نفتكر ايام زمان
ونشكل الكحك ونرصه فى صوانى مدهونة






وندخل الكحك فرن حرارته عالية ومسخنينه قبل كده ونطلعه لما وشه يحمر ويستوى
وده شكله بعد السوا قبل مانرش عليه السكر بودرة

ولما يبرد خااااااااااااااالص نرش عليه السكر بودرة ونقدمه
وده شكله بعد التقديم
ودى شكل العجمية جوة الكحك

الكحك طلع طعمه اكثر من رائع بس ناعم جدا ودسم لأننا بنحبه كده لو انتو عايزينه اخف ممكن تستبدلوا السمنة بزبدة وفى رأيى البيكنج بودر نتيجته احلى من الخميرة بكتير
وبالهنا والشفا

_________________

الرجوع الى أعلى الصفحة اذهب الى الأسفل
معاينة صفحة البيانات الشخصي للعضو http://elshefmony.mam9.com
 
كحك العيد المصرى بالعجمية من مطبخ الشيف مونى بالصور
استعرض الموضوع السابق استعرض الموضوع التالي الرجوع الى أعلى الصفحة 
صفحة 1 من اصل 1

صلاحيات هذا المنتدى:لاتستطيع الرد على المواضيع في هذا المنتدى
منتدى الشيف مونى :: مطبخ الشيف مونى :: الحلويات :: المعجنات والفطائر والتارت-
انتقل الى: