السلام عليكم ورحمة الله
كل عام وانتم بخير
طبعا مدينة دمياط هى بلد الحلويات فى مصر فعشان كده كل حاجة دمياطى بتبقى متميزة وبتبقى احلى طعم زى الهريسة اللى عملتها وهقولكم مكوناتها دلوقتى (وبالمناسبة انا اخدت طريقتها من صديقة ليا أرجو الدعاء لابنها بالرحمة وليها بالصبر)
المكونات:
2 كوب دقيق سميد ناعم
كوب الا ربع زبدة سايحة بس غير ساخنة
2 ملعقة كبيرة عسل جلوكوز وممكن نستبدله بعسل نحل
ربع كوب سكر
تلت كوب حليب
كوب الا ربع جوز هند
حوالى كوب بندق مجروش
مكونات السيرب:(والسيرب هو الشربات او القطر)
كوب سكر
كوب الا ربع ماء
عصير نصف ليمونة
الطريقة:
اول حاجة هنحضر السيرب هنحط كل المكونات مع بعض على النار واول مايغلى السيرب والسكر يدوب هنطفى عليه يعنى لونه هيبقى فاتح وهنركنه على جنب مش هندخله التلاجة
وفى كسروله هنحمص دقيق السميد لغاية مايبقى لونه دهبى
والخطوة دى اختيارية احنا بنحمص دقيق السميد عشان الهريسة تبقى نفس شكل هريسة المحلات ممكن منحمصوش حسب رغبتكم وفى اناء هنحط الزبدة السايحة والحليب
ونضيفلهم السكر
وعسل الجلوكوز
ونقلب كل المكونات دى بالمعلقة الخشب وممكن بالمضرب الكهربائى
ونضيفلهم دقيق السميد اللى حمصناه وجوز الهند
ونقلبهم مع بعض كويس لغاية ماتمتزج المكونات
ونحط الخليط فى صينية مدهونة مقاس 26 ونبل ايدينا بميه سخنة او سمنة ونساوى بيها خليط الهريسة عشان يبقى املس
ونحط عليها البندق المجروش ونضغط عليها بطبق عشان تمسك كويس فى الهريسة
ودخلتها فرن متوسط الحرارة لغاية ماإستوت ولما خرجت من الفرن سقيتها بالسيرب السخن اللى عملته
وده شكلها النهائى
وبالهنا والشفا
موضوع: الهريسة الدمياطى بالبندق من مطبخ الشيف مونى بالصور 
الإثنين يوليو 06, 2015 4:10 pm
