منتدى الشيف مونى

منتدى متخصص فى المطبخ

 
الرئيسيةالبوابةاليوميةس .و .جبحـثالأعضاءالمجموعاتالتسجيلدخول

شاطر | 
 

 شوكليت كيك مع تكات التزيين من مطبخ الشيف مونى بالصور

اذهب الى الأسفل 
كاتب الموضوعرسالة
الشيف موني



عدد المساهمات : 279
تاريخ التسجيل : 31/07/2011
العمر : 31
الموقع : elshefmony.mam9.com

مُساهمةموضوع: شوكليت كيك مع تكات التزيين من مطبخ الشيف مونى بالصور   الجمعة مارس 20, 2015 11:45 am

السلام عليكم ورحمة الله
مكونات الكيكة:
5 بيضات وممكن اربعة
فانيليا
كوب وربع سكر
كوب حليب
كوب زبدة سايحة
2 وربع كوب دقيق
2 ملعقة صغيرة بيكنج بودر
ربع كوب كاكاو خام
مكونات صوص التغطية ال glaze:
كوب الا ربع سكر
كوب ماء
2 ملعقة كبيرة عسل جلوكوز(ممكن نستبدله بعسل نحل او سيرب تقيل)
2 ونص كوب شوكولاته مبشورة
الطريقة:
فى اناء هنحط البيض والسكر والفانيليا
ونخفقهم ونضيفلهم الزبدة السايحة والحليب
ونخفقهم
واخر حاجة هنضيفها للخليط الكاكاو والدقيق والبيكنج بودر
ونضربهم كويس بالمضرب الكهربائى لغاية مايمتزجوا
ونحط الخليط فى صينية مدهونة مقاس24
ودخلتها فرن منخفض الحرارة لغاية ماأستوت وطبعا كل شخص فرنه غير التانى
نسيبها تبرد ونبدأ نحضر الglaze
فى كسرولة هنحط السكر والمياه
نشغل عليهم نار هادية لغاية مايدوب السكر ونضيفلهم الشوكولاته المبشورة وعسل الجلوكوز
ونسيبهم يغلوا على النار
ونطفى النار ونحطه يبرد فى التلاجة وبجد لازم تجربوا الصوص ده طعمه روووعة ومختلف عن اى صوص
ونجيب الكيكة بعد ماتكون برد خالص ونحطها على شبكة وتحتها طبق ونغرقها بالصوص بعد مانصفيه عشان ميبقاش فيه اى كلاكيع
وهننقلها على طبق التقديم
فى النص زينتها بشوكولاته مبشورة على شكل قلب وحواليها لولى دهبى والوردة اللى فوق القلب عملتها بعجينة الشوكولاته البلاستيك والاشكال اللى فى الجنب شوكولاته دارك وابيض
وده شكلها النهائى
تااااااااااابعونى
هشرح تكات التزيين بالتفصيل مع الصور فى المشاركة الجاية

_________________

الرجوع الى أعلى الصفحة اذهب الى الأسفل
معاينة صفحة البيانات الشخصي للعضو http://elshefmony.mam9.com
الشيف موني



عدد المساهمات : 279
تاريخ التسجيل : 31/07/2011
العمر : 31
الموقع : elshefmony.mam9.com

مُساهمةموضوع: رد: شوكليت كيك مع تكات التزيين من مطبخ الشيف مونى بالصور   الجمعة مارس 20, 2015 12:26 pm

عدنا كما وعدنا
اول حاجة بالنسبة لأشكال الشوكولاته اللى فى الجنب هنسيح نصف كوب شوكولاته بيضا مبشورة على حمام مائى ونفردها على ورق خبز ونمشى عليها بمشط الحلويات او بالشوكة
ونسيبها تجمد ونسيح نصف كوب شوكولاته مبشورة دارك ونفردها على الشوكولاته البيضا ونسيبها تجمد ونجيب قطاعة استلس اى شكل نختاره ونسخنها ونبدأ نقطع بيها الشوكولاته
وهتدينا شكل مموج جميل
بالنسبة لعجينة الشوكولاته البلاستيك ومكوناتها كالتالى:
2 كوب شوكولاته مقطعة
8 ملعقة كبيرة عسل جلوكوز(وفى الوصفة دى مش هنقدر نستبدله بمكون تانى)
2 ملعقة كبيرة زيت نباتى
الطريقة
فى طبق هنحط الشوكولاته المقطعة مع الزيت
ونسيحها على حمام مائى
ولما تسيح نشيلها من الحمام المائى ونسيبها تهدا 5 دقايق ونضيفلها عسل الجلوكوز مع التقليب
هنلاقيها بقت معانا عجينة بس طبعا هتكون طرية جدا فمش هنعرف نشتغل بيها
نغلفها بنايلون ونسيبها طول الليل عشان تتماسك بس منحطهاش فى التلاجة
وتانى يوم نشتغل بيها هنلاقيها بقت متماسكة نفردها على نشا
واول حاجة هنعملها فى الوردة هى الدعامة
وهنقطع من عجينة الشوكولاته اربع دواير
هناخد واحدة منهم نلفها على الدعامة اللى عملناها
وال3 دواير اللى فاضلين هنحطهم على بعض وفى بدايتهم الدعامة والورقة ونلفهم
هتطلع عندنا وردة جميلة
ودى اسهل طريقة نعمل بيها وردة الشوكولاته وفيه طرق كتير توضح على اليوتيوب
وهنقطع الجزء الزيادة فى الوردة
وبكده تبقى جاهزة نحطها على الكيكة او اى تورتة عندنا


وميزة عجينة الشوكولاته ان طعمها احلى بكتيييييييييييير من عجينة السكر
اخر حاجة الشوكولاته المبشورة جوة القلب على الكيكة انا جبت قطعة شوكولاته كبيرة وحطتها برة الفريزر والتلاجة لمدة يوم كامل وقشرتها بقشارة الخضار ادتنى الشكل الجميل ده وهو احلى بكتير من بشرها بالمبشرة مش بتدينا الشكل ده بس اهم حاجة تسيبوا الشوكولاته خارج التلاجة مدة كافية
وطبعا فى الاخر التزيين ده حسب رغبتكم
ناس كتير بتسألنى ازاى نحفظ الكيكة او التورتة فى التلاجة من غير ماتنشف تانى يوم
اقولهم طبعا عن نفسى اللى بعمله انى لازم احطها فى علبة التورتات والكيكات بتقعد معايا اكتر من اسبوع كأنى لسه عاملاها
يارب موضوعى يكون عجبكم
وبالهنا والشفا

_________________

الرجوع الى أعلى الصفحة اذهب الى الأسفل
معاينة صفحة البيانات الشخصي للعضو http://elshefmony.mam9.com
 
شوكليت كيك مع تكات التزيين من مطبخ الشيف مونى بالصور
الرجوع الى أعلى الصفحة 
صفحة 1 من اصل 1

صلاحيات هذا المنتدى:لاتستطيع الرد على المواضيع في هذا المنتدى
منتدى الشيف مونى :: مطبخ الشيف مونى :: الحلويات :: التورتات والجاتوهات والكيكات-
انتقل الى: