منتدى الشيف مونى

منتدى متخصص فى المطبخ

 
الرئيسيةالبوابةاليوميةس .و .جبحـثالأعضاءالمجموعاتالتسجيلدخول

شاطر | 
 

 كنافة عش البلبل(أساور)صغيرة ومتساوية زى المحلات من مطبخ الشيف مونى بالصور

اذهب الى الأسفل 
كاتب الموضوعرسالة
الشيف موني



عدد المساهمات : 279
تاريخ التسجيل : 31/07/2011
العمر : 31
الموقع : elshefmony.mam9.com

مُساهمةموضوع: كنافة عش البلبل(أساور)صغيرة ومتساوية زى المحلات من مطبخ الشيف مونى بالصور    السبت أغسطس 03, 2013 2:07 pm

 السلام عليكم ورحمة الله
كل عام وانتم جميعا بخير يارب يكون عيد سعيد علينا كلنا ان شاء الله
ده اخر موضوع هقدمه فى شهر رمضان ان شاء الله لأنى السنة دى معملتش حاجة العيد
انا شفت كتير مواضيع على النت محتارين فى كنافة عش البلبل وانا كنت محتارة زيهم لأنها بتطلع منعكشة معاهم
فحبيت انقل لكم تجربتى البسيطة فيها يمكن تفيدكم ان شاء الله ويارب تعجبكم
المكونات:
نصف كيلو كنافة طرح (واسمها بردو فى المحلات كنافة بورما)
2 كوب سمنةسايحة
كوب ونصف سيرب تقيل بارد(السيرب هو الشربات او القطر او الشيرة)
بندق ولوز للحشو(وممكن فستق او اى مكسرات تانيه يعنى حسب الرغبة)
ملحوظة:المكونات دى على قد الصينية اللى انا مصوراها
الطريقة
اولا ده شكل الكنافة الطرح

هنقطع منها جزء صغير زى كده

ونلفه على ايدينا زى كده
شايفين اخر الخصلة اللى قطعناها دى نمسكها بالايد التانية ونشدها واحنا بنلف بس طبعا الايد التانيه كنت بصور بيها فعشان كده الخطوة دى مش ظاهرة
لازم نشد بالايد التانيه عشان الاساور تبقى ماسكة نفسها ومتخافيش مش هتتقطع منك
ومش شرط نلف على ايدينا ممكن نجيب اى حاجة نلف عليها زى المعلقة الخشب او قلم مثلا اللى يريحنا

ونبدأ نرص فى الصينية بشكل دائرى ونحط فى كل واحدة نعملها المكسرات


لغاية ماتخلص الصينية

هنسيبها برة ومن غير اى سمنة ليلة كاملة عشان تعضم وتنشف وتكون متماسكة
ولما نيجى نساويها هنحطلها كمية السمنة وهتكون سايحة بس مش سخنة واللى تفتكر السمنة الكتير لاء هى مش كتير ولا حاجة هى بتتحمر فى السمنة دى فى الفرن وكمان لما بنخرجها من الفرن بنصفى السمنة الزيادة وهى اساس سواها كمية السمنة دى وده من عوامل نجاحها وفيه ناس بتحط اكتر مانا حاطة بكتير
هنا واحنا بنحط عليها السمنة


وهندخلها الفرن على حرارة عالية(200 مثلا)
ده شكلها فى الفرن قبل ماتستوى على الاخر

ونطلعها لما يبقى لونها دهبى وفيها ناس بتحبها اغمق من اللى عاملاها بس انا شايفة ان كده معقول
اول مانطلعها نصفيها من السمنة الزيادة
ونحطلها السيرب البارد

وممكن لما تبرد شوية نصفيها من السيرب الزيادة بس على فكرة ممكن تحطو سيرب اكتر للى بيحب السكر الزيادة فى الحلويات
ونقدمها لما تبرد
وده شكلها






عوامل نجاح الكنافة الاساور:
اولا الكنافة لازم تكون كنافة طرح مينفعش كنافة عادية
ثانيا لازم تكون طازة جدا لو اتحطت فى الهوا نشفت او باتت مش هتنفع
ثالثا واحنا بنشتغل بالكنافة لازم تكون متغطية بقماش مندى يعنى مبلول مياه عادية مش ساقعة بس معصور كويس جداااا
رابعا هتسألونى هو النص كيلو عمل صينية واحدة بس هقولكم انا استبعدت القطع المنعكشة فى الكنافة عشان الاساور متبقاش منعكشة معايا لأن طبعا على مانجيب الكنافة من المحل ونرجع بيها البيت فيه اجزاء منها هتتبهدل والقطع اللى استبعدتها دى فى الاخر اخدتهم وقطعتهم وعملت بيهم صينية كنافة عادية بالقشطة
يارب موضوعى البسيط ده يكون عجبكم
الرجوع الى أعلى الصفحة اذهب الى الأسفل
معاينة صفحة البيانات الشخصي للعضو http://elshefmony.mam9.com
 
كنافة عش البلبل(أساور)صغيرة ومتساوية زى المحلات من مطبخ الشيف مونى بالصور
الرجوع الى أعلى الصفحة 
صفحة 1 من اصل 1

صلاحيات هذا المنتدى:لاتستطيع الرد على المواضيع في هذا المنتدى
منتدى الشيف مونى :: مطبخ الشيف مونى :: الحلويات :: الحلويات الشرقية والغربية-
انتقل الى: